ვრცელდება რეპერისა და პროდიუსერის, შონ Diddy კომბსის დაკავების კადრები
გამოცემა CNN-ის ინფორმაციით, ამერიკელი რეპერი შონ Diddy კომბსი [Puff Daddy], რომელიც 2023 წელს სექსუალურ ძალადობაში ორმა ქალმა დაადანაშაულა და მის წინააღმდეგ ტრეფიკინგთან დაკავშირებით ფედერალური გამოძიება დაიწყო, დაკავებულია. ამის შესახებ CNN-ს მისმა ადვოკატმა აცნობა.
საკითხთან დაკავშირებულმა წყარომ CNN-ს განუცხადა, რომ კომბსი, რომელიც ქალაქ ნიუ-იორკში წინა კვირიდან იყო, 16 სექტემბერს მანჰეტენში დააკავეს და და იგი აშშ-ს შიდა უსაფრთხოების დეპარტამენტის გამოძიებათა სამსახურმა აიყვანა.
ნიუ-იორკის სამხრეთის ოლქის პროკურორის, დემიენ უილიამსის განცხადებით, დაკავება საბრალდებო ოქმის საფუძველზე მოხდა, რომელიც მოგვიანებით გასაჯაროვდება.
ამ დროისთვის ამერიკელი რეპერის წინააღმდეგ ბრალდებები და საქმის დეტალები უცნობია.
ერთ-ერთი წყაროს მიხედვით, კომბსის ჩაბარების საკითხზე სამართალდამცავ ორგანოებთან მოლაპარაკებები მიმდინარეობდა, ხოლო საბრალდებო ოქმი 16 სექტემბერს მიიღეს.
კომბსის ადვოკატების თქმით, რეპერი გამოძიებასთან თანამშრომლობდა, რასაც საბრალდებო ოქმი მოჰყვა და იგი "ბრალდებების მოლოდინში ნიუ-იორკში თავისი ნებით ჩავიდა". მისი გუნდის ამტკიცებს, რომ იგი უდანაშაულოა და, რომ მას "დასამალი არაფერი აქვს".
მიმდინარე წელს კომბსის წინააღმდეგ ტრეფიკინგთან დაკავშირებით აშშ-ს შიდა უსაფრთხოების დეპარტამენტის საგამოძიებო სამსახურმა ფედერალური გამოძიება დაიწყო, რის ფარგლებშიც ლოს ანჯელესსა და მაიამიში რეპერის სახლები გაჩხრიკეს.
ჩხრეკის შემდეგ სამართალდამცავი ორგანოს ერთ-ერთმა წყარომ CNN-თან განაცხადა, რომ ფედერალური გამოძიების საფუძველი რეპერის წინააღმდეგ სამოქალაქო სარჩელში წარდგენილი სექსუალური ძალადობის ბრალდებებია.
2023 წლის ნოემბრიდან დღემდე, ამერიკელი რეპერის წინააღმდეგ ათი სარჩელი აღიძრა, რომელთაგანაც ცხრაში მას სექსუალურ ძალადობაში ბრალს პირდაპირ სდებენ. CNN-ის ცნობით, ბრალმდებლები ფედერალურ გამომძიებლებს დაკითხვის მიზნით უკვე შეხვდნენ.
ვიდეო: "ტაბულა"
