5 თვის ბავშვი სუნთქვის პრობლემებით კლინიკაში გადაიყვანეს, მოსანახულებლად მისული მამა კი მას ყოველდღე აწამებდა - აღძრულია სისხლის სამართლის საქმე
22 წლის მამამ კამისანო ვისენტინოდან (ვიჩენცა) სავარაუდოდ აწამა თავისი ხუთი თვის ვაჟი, რომელიც საავადმყოფოში იყო მოთავსებული. ბავშვი „სასწრაფოთი“ გადაიყვანეს სუნთქვისა და საჭმლის მომნელებელი სისტემის სერიოზული პრობლემებით, მაგრამ ექიმებმა ვერ გაარკვიეს, რატომ არ უმჯობესდებოდა მისი მდგომარეობა და პირიქით, დღითი დღე უარესდებოდა.
როგორც PadovaOggi იტყობინება, ბავშვი თავდაპირველად საავადმყოფოში 22 წლის მამამ, რომელიც ახლა გამოძიების ქვეშაა და მისმა 20 წლის დედამ მიიყვანეს. 10 დღის შემდეგ ბავშვის მდგომარეობა არ გაუმჯობესებულა, ამიტომ იგი პადუაში ახალშობილთა განყოფილებაში გადაიყვანეს. თუმცა, იქაც ბავშვის მდგომარეობა არ გაუმჯობესებულა და ექიმები დაეჭვდნენ.
პადუას საავადმყოფოს გენერალურმა დირექტორმა ჯუზეპე დალ ბენმა ისაუბრა "წარმოუდგენელ" სიტუაციაზე და გადაწყვიტა, ეცნობებინა პროკურატურისთვის, რათა გაერკვია, რა ხდებოდა. ამგვარად, ბავშვთა ოთახში გადამალეს მიკროკამერები და გაკეთდა შოკის მომგვრელი აღმოჩენა: ვიზიტის დროს მამამ ისარგებლა იმით, რომ ოთახში ექიმები და ექთნები არ იყვნენ, ბავშვს თითები ღრმად ჩაუყო პირის ღრუში და მკერდზე ძლიერად დააწვა, სანამ სერიოზული დაზიანებები არ მიაყენა.
გამომძიებლების ჰიპოთეზა შემაძრწუნებელია: 22 წლის ბიჭს არ სურდა შვილის მოკვლა, არამედ სურდა მისი დაინვალიდება და შეუქცევადი დაზიანებების მიყენება, რათა სახელმწიფო სუბსიდიები მიეღო.
ამჟამად პატარა ბიჭი პადუას საავადმყოფოს ახალშობილთა ინტენსიური თერაპიის განყოფილებაში იმყოფება და მისი მკურნალობა გრძელდება. დალ ბენი იმედოვნებს, რომ ბავშვი გამოჯანმრთელდება, თუმცა მან განაცხადა, რომ გამოჯანმრთელების პროცესი მაინც ხანგრძლივი იქნება.
