ლექტორი, რომელიც სტუდენტებს ფიზიკურად გაუსწორდა: ვინ არის ნანი გვარიშვილი?

ბათუმის სახელმწიფო უნივერსიტეტის ლექტორ ნანი გვარიშვილთან ერთად სტუდენტებს მისი ქმარ-შვილიც დაუპირისპირდა - ქმარი, ანზორ დევაძე, ამავე უნივერსიტეტის პროფესორია, შვილი, ლელა დევაძე კი ასისტენტ-პროფესორი | ინფორმაციას გამოცემა აჭარა თაიმსი ავრცელებს და წერს, რომ მას შემდეგ, რაც ბსუ-ს მიმდებარედ მყოფ ახალგაზრდა აქტივისტებს ნანი გვარიშვილი ფიზიკურად დაუპირისპირდა, მათ სიტყვიერი შეურაცხყოფა მიაყენა ანზორ დევაძემ, მოგვიანებით კი დაპირისპირებაში მათი შვილიც ჩაერთო

კადრები, სადაც ჩანს, როგორ უპირისპირდება ლექტორი სტუდენტებს გამოცემა აჭარა თაიმსმა დღეს გაავრცელა. რუსთაველის ქუჩაზე, ბსუ-ს მიმდებარედ შეკრებილი ახალგაზრდები დიუშენის სინდრომის მქონე ბავშვების მხარდასაჭერად ხელმოწერებს აგროვებდნენ, როდესაც მათ ნანი გვარიშვილი დაუპირისპირდა

გამოცემის ცნობითვე, ამ დროისთვის სამოქალაქო აქტივისტები ბათუმის პოლიციის მეექვსე განყოფილებაში იმყოფებიან და ჩვენებას აძლევენ. უცნობია, დაიწყო თუ არა ფაქტზე გამოძიება. „ველოდებით სამართალდამცავების გადაწყვეტილებას და უახლოეს დღეებში ეთიკის კომისიას მოვიწვევთ“ - აცხადებენ უნივერსიტეტში